Matuu Grammar (Ka thlum ham mueh om)

OLRHOEKNA

Matuu ollung, ca daek dan neh ca tael dan he a soeng la, a hman la Matuu aka mingna thlangtom boeih loh a ming hamla tuengcoeng, daek hamla a ngoecoeng tih, Matuu ca daek dan neh “Grammar” he bet ah thuicaihna kan tueng sak hamla ka ngaihna om. Grammar benla caeh thlan ah olrhoekna la thuicaihna bet ka khueh hamla ka ngaih.

Matuu Yahoo groups khui-ah mai aa? Atloe ca-uk cabael mai dong aa? Ca taelkung rhoek loh ca he mueh a tael khui ah tae hamla a then neh, yaakmingna a then he mueh ka hmuh van bangla tae la aka lo pawh, yaakming hamla bahoeng aka rhai khaw mueh om bal. Phoeibalah, loh hamkoi, ming hamkoi, hmang hamkoi mueh ka hmuh khaw om bal. Matuu ol ka ming pawt cina, calung a thai ka rhuh, ka ming khaw mueh om. Catlang (sentence) a hman neh a hman pawt khaw ka tlaih ka vong thai tih, ca ka thut vaengah ka rhalrhingna khaw mueh om. A kongai sawt vaengah ca tah a dek u dae, a yet ngai he yaakming hamla bahoeng rhai, tae hamla khaw bahoeng rhai. Matuu cako he tinhinhang kah Globalization Media ah sawt vaengah, cathoem cathai, degree a sang khaw mueh aka lo thlang he omcoeng. Degree a sangmanu aka lo thlang long khaw Matuu ca he a then heet la aka tael thai pawh, a tael hamla khaw a ko khui-ah om pawh, a tael bal ah nim yaakming koi lam khaw om pawh ti he mueh hmuhna om bal. A ngen loh ca a tael vaengah a mah kah ngaihna bangla u u long khaw boeih a tael u. Calung, alphabets hman dan he khaw pakhat la hmang muehla khat loh a thloeh, khat loh a thloeh, a hman vaengah ha ben lam kah a tael ke aa aka hman co, tepawt atah, khat long ca lung a hmang ke ah ka hman lah eh ka titih, a hnuuk a mhaila puet a can he ka boeih.

Te, ollung kawng he bet ah kamahka hmuna ah kan thui u van mai la eh. Matuu khui ah he tahae due he ollung dongah mai coeng ah tohna uthae, thiina uthae he khing om tih, Cing, Doem titih, khat neh khat he rhoepna khaw om pawh, rhoepna a om pawt dongah, u ca u ca long khaw a mah kah a ngaih calung he boeih a hmang tih ca daek u. Tih, kai loh ka hmuna atah Matuu ah he ollung he pakhat la om koi nih bahoengla then ni. Kamah neh kamah he dongah coeng ah dawtna tlueng ka khueh. Cabu he ka thut eh ti vaengah mebang calung le, mabang alphetbets lae ka hmang eh ka ti tih poekna khaw khing ka khueh. Poekna rhuet ah ca tael ham la vik ka thlongna khaw mueh om. Ka poekna rhueh ah ka tha a thaena khaw om.

Ollung kawng he ka thui pawt vetih, ca thut vaengah a long a im cala tael a ngoe ti he ni ka thut hamla ka ngaih. Ollung kawng ng’ thui mai koi nih, (subject) pakhat lam khaw om, bahoengla a kaa dongah khueh mai dae lah sih. A ka tael ngaih loh thut van parhaap saeh. Hikah “Grammar” kawng ka thut he Thlangbokrhoek kah a sai te patoeng ka awt van tih, thut la a om dongah thlangbokrhoek kah calung he Matuu ol la leh thuk leh hang vaengah a rhaina bahoeng om. Tedongah, calung pakhat rhip te phek phek ka leh thai pawt dongah, calung pakhat kah a thuingaihna te ni catlang a sen la ka leh la om. A lak vaengah Thlangbokrhoek kah ollung a thuingaihna he Matuu ollung la kong vaengah tael hamla a lolhna, yakmingna hamla khaw a rhaina om. Matuu ollung kah a thuingaigna bal khaw Thlangbok ol la leh bal vaengah rhai bal. Tevaengah, nang neh kai loh poek heet tih sai hamla, yawm hamla tuengcoeng. Matuu ol la a ka om pawh, ollung a ka rhai te tah Thlangbokrhoek kah calung te vat la om. Vat tueng tah vat ham om coeng. Tedaengah ni, calung hoeptlang vaengah yaakming thai la om eh, a yoina khaw om eh.


Analyze saina

Hikah analyze saina he tah, ca aka tae nang loh a then la poek lam tah na tae koi ni cala then vetih, tae-aep mingna, poek pueina khaw koep na khueh thai. Na tomna khaw na khueh thai. Mah Matuu ah he cabu cabael he sawt vaengah yol tangkiik pueng tih, Dictionary pataeng he khaw a then cala, a soep cala kong he om thlan. Tevaengah, ca a ka tael long he ngairhung ngairha la a taelna khaw mueh om. Thlang pakhat long ca a tael ke thlangbook rhoek taengla yakming thaina hamla tael a ngoe, tevaengah, thlangbok na thui, na cang puei vaengah, grammar la na thui pawt koi nih a yaakmingna hamla la bahoeng rhai.

Thuinamai-ah,

“Ca a yol kam pat” heheh analyzed sai lah sih,

Ca (noun) = letter
a (pronoun) = it, its
yol (adj.) = little, few, small
kam (pronoun) = I, we
pat (verb) = send

Literal translation: “letter it few I send”
G: “I send a few letters”

A dangka thlang pakhat loh ca a dek ke so lah sih!


“Oe! Titah, ca khaw yetcoeng he. Taedae saeh!


A sokah ca patna ke thlangbok ol la analyze sai bal lah sih!

Oe (adj.) = well, yes, yap, yea
titah (conj) = so, therefore,
ca (n) = letter
khaw (adverb) = also, too, even
yetcoeng (verb) = Over,
he (pronoun) = this, these
taedae (adj.) = enough, but



“Rhen bihna” catlang he analyze sai lah sih

“Rhenna kan bih” he catlang la sawt vaengah soep pawh. Batikoi nih thlang pakhat loh “rhenna kan bih” catlang bueng he thui mai koi nih ol he soep pawh. Balae “rhenna a bih tite a thui hamla om. Thuinamai-ah: “tangka nan patna thai hamla rhenna kan bih”. Hikah catlang he tah soep. Tii a ni, aka yatu long khaw a yakming eh. Tadae, a dang kah “rhen bihna” kawng ke analyze sai mai lah sih.

(1) “Rhenna kan bih” – I beg your pardon or pardon me. “Kan” he tah thlang a yol loh a bih, (singular) la om.

- rhenna (n) mercy
- kan (pro) I or we
- bih (v) ask, beg

(2) “Rhenna kan bih uh” – We beg for mercy. Matuu ol la thlang a yet loh rhenna a bih vaengah “uh” tihe a hmang. “uh” calung long he balae a sai ti koi nih, thlang a yet loh a thui, a sai tite a tueng sak, phoei-ah thlang a yet loh a bih tite yakming thai la om. “uh” he saina ben la cet tih, hnopai pakhat khat mai aa? Thlang a yet loh a sai vaengah hmang la om. Thlangbok ol lam tah (pronoun) la om ni. Matuu ol la thlang a yet loh a sai vaengah calung he panit la tael a ngoe. Batikoi nih “kan” bueng he in tael mai koi nih, a yol ben la vik cet. Thlangbok ol lam tah a yol a yet he calung pakhat la om tih pakhat bueng tael a khaw pahoei a thuingaihna he soep. “kan” he a yol la om dae “uh” in tael pa thil vaeng atah “uh” long he “kan” te a yet a la a tueng sak.

- Rhenna (n) mercy
- Kan (pro) I
- Bih (v) ask, beg
- Uh (pro) we or they (using for plural)

(3) “Rhenna a bih” a ngen loh ca a tael uh vaengah “a” catham neh a hnuuk kah calung aka lo calung he rhep a bet u rhoi la rhawp a tael uh. “Abih” tihe calung pakhat la a om thai moe nih. Batikoi nih “a” neh “bih” he a thloeh thloeh la a om hamla om. “a” he (pronoun) tih “bih” he (verb) la om. Thuinamai-ah (a bih, a caak, a sai, a nan, a paek, a dawn, a sak, a thui, ect.) tila tael ham om. Matuu ol lam tah “a” catham he huta tungpa loh rhen a hmang. Hnopai, saram ming yueng lam khaw a hmang bal. Huta loh a thui, tungpa a thui he a thloeh cala om pawh.

Rhenna a bih – He/she/it begs for mercy.

- Rhenna (n) mercy
- A (pronoun) he, she, it
- Bih (verb) ask, beg

Note: Pronoun neh Verb kawng he a hnuuk ah a yet ngai la thuicaihna om bat ni.

(4) “Rhenna a bih uh” he khaw pahoei a yet loh a bih tite tueng. A so-ah ka daek tangtae bangla “uh” he catlang dongah thap pah thil atah a yet la coeng tite a caih la tueng.

Rhenna a bih uh – They are asking for mercy.

- Rhenna (n) mercy
- A (pro) he/she/it
- Bih (v) ask, beg
- Uh (pro) they, we

(5) “Rhenna ka bih” neh “Rhenna kan bih” he thlaeidan lah sih. Hikah catlang panit kah a thuingaihna he bok ah vai uh rhoi ngawn dae, a langna bet om. “rhenna ka bih” tihe na paya pakhat khat taengah na thui pa vaengah ni na hmang thai. ‘rhenna’ na bih kung taeng la thui thai la om pawh. Nang loh bomna na bih vaengah aka bom kung taengah “kan” calung he na hmang tih na thui hamla om. “kan” he olthenna lam khaw a hmang bal. Thuinamai-ah (kan lungna, kan thintlohna, kan payana, ect.)


(2) Matlamlae ca he ng’ thut lah eh?

Thlangbokna kah ca ng’ tae vaengah calung (word) pakhat rhip kah a thuingaihna he boeih om. A caih cala yakmingna khaw om. Tih, matlamlae thlangbokrhoek loh ca he a thut u, a daek u, tivaengah ning Matu rhoekca long khaw thlangkah a sai, a mhang dan he cala ming hamla a ngoe tangkiik. Thlang kah a sai van bangla awt tueng, loh tueng, hmang tuengcina he ng’ awt van hamla om. Mahka ngaihna bangla khing ng’ tael koi nih, rhoengna he om thai mah pawh. Matuu ca boeih he khaw kopoek thikat la a om hamla a ngoe bal. Kopoek thikat la om pawt koi nih rhoengna ham bahoengla rhai. Khat loh kopoek a thloeh, heben kah thlang loh a thloeh la om mai koi ni, hmaiben caanaa hamla longpui ng’ ong pamueh la, longpui te vik pit bangla om.

Thlangbok ol lam tah calung pakhat rhip he (Parts of Speech) ati tih, boeih a hoep ca. Tetla calung a hoi a lae dongah calung pakhat rhip kah a thuingaihna he tueng tite hmuh thai la om. Tetla calung a hoeptlangna te “Grammar” tila a thui. Te dongah, mah Matu ol he khaw ollung hoeptlangna he a om pawt atah calung kah a thuingaihna he yakmingna hamla bahoeng rhai.

Noun: Hmuh thai la aka om, hmuh thai la ak om pawh, taek thai la aka om, taek thai la aka om pawh hnopai boeihboeih kah ming he “noun” tila a thui.
Thuinamai-ah; ( tui, im, khosae, khotli, thlang, sael, hikhah, aithluei, ui, etc.)

Thlangbok ol la “Noun” dongah (singular neh Plural) tila om tih, mah Matuu ol dongah khaw om van. A yet la daek sih ti koi ni (imna, thlangna, saelna) tila om. “Im neh na” a tloe a tloe la tael mai koi nih, a thuingaihna he a thloeh thloeh la vik om. “Im” tivaengah yakming thai la om tih, “na” pakhat he balae a thuingaihna ti he rhawp om pawh, yakming thai lam khaw om pawh. Tedongah, “Im na” tila a tloe a tloe la ng’tael pawt vetih “Imna (houses)” tila tael hamla om. Tedaengani, ollung kah a thui ngaihna he yakming thai la om.

Singular (yol)

1. Im = house
2. Ui = dog
3. Va = bird
4. Khawt = cup
5. bael = plate

Plural (yet)

1. Imna / Imcina = houses
2. Uina / Uicina = dogs
3. Vana / Vacina = birds
4. khawtna / khawtcina = cups
5. baelna / baelcina = plates

Tephoeibalah, hmuh thai pawh hnopai he (noun) tila om bal. Noun ti ngawn dae, Noun khui-ah koep a paek bal tih, kopoek neh yakming thai te (abstract noun) tila a thui. Thuinamai-ah (khothli, omngaihna, lungna, omthenna, sadingna, kothaena, etc.) tila om bal. “omngaihna” calung he mik neh hmuh thai la om pawh, kopoek nen ni ming thai la a om. Tedongah, (Astract Noun) tila a thui. Hekhaw a tloe tloe la ollung he tael mai koi nih, yakming thai la om pawh. “Omngaih neh na” he a tloe tloe la tael koi nih a sulam he om pawh. Phoeibalah, “om ngaih na” tila khaw coeng thai bal pawh. Tedongah, “ om ngaih na neh omngaih na” tila tael mueh la “omngaihna” tila tael ham la a ngoe.

Thuinamai-ah; “om ngaih na” hikah calung pathum he koep so bal lah sih. Thlangbokrhoek mai loh a so kah calung pathum ke ka yakmingna hamla han thuicaih lah ti mai koi ni, nang neh kai loh matlamlae ng’ thuicaih pa eh. Tevaengah, calung pakhat rhip kah a thuingaihna te na thui thai pawt koi nih, banglam khaw a santlai pawt la vik om ni. Tedongah, mah Matuurhoek long khaw “Grammar” tila calung he hoeptlangna tila sai hamla om.

“Om ngaih na” calung he thlangbok ol la leh lah sih.

-Om = is, was, are, were, be, have
-ngaih = love, want, like
-na = ?

“na” calung he balae a thuingaihna co kai khaw rhawp ka thui thai voel pawh. Mah Matuu ollung la om khaw om khoem mai aa? Kai tah ka ming pawh. Apaibaena ah, “omngaihna” ollung he Thlangbok ol la koep leh bal lah sih.

-Omngaihna = happiness, gladness tila leh thai la om. Hetah Thlangbok rhoek loh (direct) la a yakming thai.

Thlangbokrhoek loh mavaeng akhaw “happiness” calung he a thloeh thloeh la a daek moe ni. “Happiness” he “happi ness” la tael mai koi nih, palh tite pahoei tueng coeng. Dictionary dongah khaw na tlap cakhaw na hmuh mah pawh. Tevanbangla, mah Matuu ol he Thlangbokrhoek loh a sai bangla awt hamla om van. Calung lung khat la a ka om koi te rhep bet u thae la tael ham om.

Common Noun: heheh thui bal lah sih, he tah hmuen, hnopai, neh thlang boeihboeih kah ming te a yuengla a hman. A ming he rhep thui pawh.

Proper Noun: Hetah hnopai, khohmuen, thlang kah a ming he rhep a thui. Proper Noun he tah calung a len (capital letter)la rhawp a tael.

Thuinamai-ah: Thang Tong he (Proper Noun), Tunpa he (Common Noun)
Phanaeng he (Proper Noun), Kho he (Common Noun)
India he (Proper Noun), Ram he (Common Noun)

Analyze Saina

1. Thang Tong = person’s name
2. Tungpa = boy, male
3. Phanaeng = the name of village
4. Kho = village, town
5. India = the name of country (Ram pakhat kah ming)
6. Ram = Country
7. he = is, are, was, were, be

- Thang Tong he tungpa. = Thang Tong is a boy.

Ollung “tungpa” he Common Noun la om. Batikoi nih tunpana boeihboeih kah ming yuenla a hman dongah. Thang Tong he Proper Noun la om. Batikoi nih a ming he rhep a paek dongah.

Collective Noun: Hnopai ming, thlang ming mai aa? Pakhat bueng te maengtaeng tih thuingaihna pawh, tun ah a ka om ke a thuingaihna. Cako tivaengah thlang pakhat bueng om pawt tih, cako khui ate thlang panit pathum khaw om thai, telak ah a yet khaw om thai bal.

Thuinamai-ah:
-Pintun = collection
-Cako = family
-Miphun = nation
-committee = committee
-cingcui = unite, unity
-Huiko = cousin, relative

“Noun” dongah tae thai la a ka om te tah (Countable Noun) tila a thui tih, thuinamai-ah: tungpa, marhang, tuihai, ngannu, nganpa, tumbael, ca-uk, tila om.
Tae thai la a ka om pawt te tah (Uncountable Noun) ti tih, thuinamai-ah: hmaiphu, lungkaeh, cangyen tila om. Hmuh thai mueh, taek thai la a ka om pawh (abstract noun) he pa thai bal, thuinamai-ah: khothli, khosae, omthenna, lungvatna, thlangthenna. Uncountable Noun he Matuu ollung dongah a yet la in tael thai pawh. Mah Matuu ol dongah khothlicina, khosaecina, lungvatnacina tila om thai pawh. A yol a yet te a tloe tloe la om van pawt bangla thlangbokna kah ollung dongah a khaw om van pawh.